Barroù Mae
D'enderv-noz, deiz diwezhañ miz Ebrel, emañ an akustumañs dre-mañ mont da glask barroù faou nevez. Bokedoù Mae a vez graet anezhe rak ret e vez dezhe bout staget an nozvezh-se evit ma vint gwelet doc'h an tier d'ar c'hentañ mitin a viz Mae. Ur barr a vez doc'h fenestr an ti. Met ivez doc'h ar c'hraou, da lâret eo doc'h pep lojeris, tud pe loened, hep ankouezhat klud ar yer, ar foenneg pe ar blouzeg, nag ar c'harrdi lec'h ma vez ar mekanigoù hag ar benvegoù.
Evit petra kement-se? Sañset eo, e vo gwarantet an ti, an dud, ar loened, ar madoù, doc'h pep fall degouezh.
Ar vugale n'ankouazhont ket mont d'ober un dro d'ar c'hoad tostañ evit dastum ar barroù Mae. Dont a raont gante a vrec'hadoù hag ur blijadur eo evite o lodenniñ etre tier an dro.
An akustumañs nend eo ket anavezet e meur a lec'h, pe marse emañ kollet.
Soñj am eus, ur bloaz ma en em gaven e Kemper d'ar c'hentañ a viz Mae, bout gwelet tud kêr souezhet-bras o welet kirri ha tankirri daet a zremañ, pep unan gant e varrig. En Oriant, e-leizh a dier o deus dalc'het d'an akustumañs desket gant o zud a-ziwar-vaez. Ma ne vez ket diskoezet ar boked doc'h tu ar maez, e vez staget war-dreñv, evit derc'hel da « lezenn » ar re gozh.
Lâret em eus e vez degemeret barr Mae evel ur seblant a chañs vat. Met a ven emañ daet an akustumañs? Ag amzer ar baianed o deus lâret lod. Nag e vehe? Paian pe pas, me 'gav emañ un dra plijus saludiñ evel-se an amzer nevez, ha diskoeziñ fiziañs en dazoned.
E meur a lec'h, e oa ar pleg gant ar baotred yaouank bokediñ fenestr o gwellañ- karet. Met paotred a galon en em gave evit stagiñ ur boked doc'h fenestr razh ar merc'hed yaouank. Hani ne veze ankouaet hag evel-se pep plac'h a ouie doc'h an dra-se e oa bet ur paotr evit bout bet ur soñj eviti. Ha ne gavit ket-c'hwi brav an dra-se?
Mamm (Doued'he fardono) he doa klevet un dra arall.
En amzer-se e oa ar Farizianed o klask war-lerc'h Jezus evit gober droug dezhañ. Unan bennak en doa diskouezet dezhe an ti lec'h ma en em gave. Evit anavout an ti, int o doa staget ur barr doc'htañ. Met ha p'o deus distroet en-dro gant soudarded, petra o deus gwelet ? Razh an tier o doa ur barr ! Penaos anavout an ti a glaskent? Peogwir, er vro-se, an tier 'zo heñvel an eil doc'h egile?
Setu ar pezh em eus klevet. Marse e ouiit un tamm bennak muioc'h.
Job Jaffré-Mabedad 08/03/1980
(Etrezomp e Brezhoneg – kempennet get Daniel Doujet)
